Պահոց
Տարադրամի Փոխարժեքներ
USD   479.98  դրամ
EUR   534.46  դրամ
RUB   7.42  դրամ
Եղանակը Ստեփանակերտում
22.04.2019   ՍՏԵՓԱՆԱԿԵՐՏՈՒՄ ՆՇԵԼ ԵՆ ՍՈՒՐԲ ԶԱՏԻԿԸ ԿԱՄ ՍՈՒՐԲ ՀԱՐՈՒԹՅԱՆ ՏՈՆԸ

Արցախի մայրաքաղաք Ստեփանակերտում մեծ ոգևորությամբ ու խանդավառությամբ է նշվել եկեղեցական ավանդական տոնը` Սուրբ Զատիկը, որը մեկնարկել է նորկառույց Աստվածամոր Սուրբ Հովանի մայր տաճարի հարակից տարածքում` լուսաճրագի <<փոխանցմամբ>>, որ օր առաջ տուն են տարել մարդիկ` պատարագ մատուցելուց հետո:

Բնակչության տոնական տրամադրությանը նպաստել է  և Ստեփանակերտի քաղաքապետարանի մշակույթի, երիտասարդության հարցերի և զբոսաշրջության բաժնի կողմից պատրաստված հետաքրքիր և հագեցած ծրագիրը: Մշակույթի տան երգի-պարի համույթը` հանրակրթական հաստատությունների աշակերտների մասնակցությամբ հանդես է եկել համերգով, որի ժամանակ հնչել են եկեղեցական, ազգագրական, ժողովրդական երգեր ու խաղիկներ, հայրենասիրական ստեղծագործություններ, օրհնվել է Սուրբ Հարության տոնը, Հիսուսի հարությունը:

<<Զատիկը քրիստոնյաներիս համար եկեղեցական արարողություն չէ միայն, այլ հոգևոր կյանքի վերանորոգման առիթ, բարու հաղթանակ: Այն գարնան և վերակենդանացած բնության տոն է: Եվ պատահական չէ, որ ծառատունկը կատարում ենք հենց այս օրերին` հողին պահ տալով մատղաշ շիվերը, թփերն ու ծաղկասածիլները>>,- ասում է Ստեփանակերտի Աշոտ Ղուլյանի անվան դպրոցի փոխտնօրեն Կարինե Աբրահամյանը:

Միջոցառմանն առանձնակի շուք են հաղորդել քաղաքի տարբեր կրթօջախների և ստեղծագործական տների սովորողների` տոն օրվա խորհուրդը բնորոշող զատկական առատ սեղաները` գեղարվեստական հյութեղ  ու ներդաշնակ ձևավորմամբ: Շուրջ երեք տասնյակ տաղավարներում դպրոցականների կողմից ներկայացվել էին նաև նկարչական և ձեռագործ աշխատանքներ, հուշանվերներ: Կազմակերպվել էր ցուցահանդես-վաճառք և այցելուներից ոչ-ոք անտարբեր չէր կարող մնալ տոնական գայթակղիչ առատ տեսականու նկատմամբ:

Պետական այրերի ուղեկցությամբ տաղավար է այցելել և հանրապետության նախագահ Բակո Սահակյանը, ով շրջելով ու ծանոթանալով երեխաների կողմից հեղինակած  ցուցանմուշներին, զատկական մրգեղենով ու անուշեղենով լի ձևավորված  զամբյուղներին, գովեստի խոսքեր հնչեցրեց նրանց և դասավանդող ուսուցիչների հասցեին:

 Հայտարարված մրցույթում լավագույնը ճանաչված խմբերն արժանացել են քաղաքապետարանի սահմանած մրցանակներին: Հատկանշական է, որ  նվերներ են ստացել միջոցառման մասնակից  բոլոր  փոքրիկները:  <<Այս    ձեռնարկմամբ       մեր աշակերտները փորձել են  անսասան պահել մեր հավատը, ազգային ոգին, մեր եկեղեցական ավանդույթներն ու սովորությունները,- գտնում է մայրաքաղաքի  8-րդ դպրոցի ուսուցչուհի Ռուզաննա Պետրոսյանը: - Տոնական միջոցառումն, անկասկած խորհրդանշում է նաև մեր ժողովրդի միասնությունն ու համախմբվածությունը>>,- համոզված է նա:

Այցելուները կազմակերպիչների կողմից հյուրասիրվել են թխվածքաբլիթներով և չրամրգերով:

Հավելենք, որ Սուրբ Հարության տոնի առթիվ Արցախի հոգևոր թեմի առաջնորդ Պարգև արքեպիսկոպոս Մարտիրոսյանը մայրաքաղաքի Աստվածամոր Սուրբ Հովանի մայր տաճարում Սուրբ պատարագ է մատուցել, որին բարձրագույն ղեկավարության ուղեկցությամբ  ներկա է գտնվել նախագահ Բակո Սահակյանը:

   Մայր Տաճարում մատուցված սուրբ պատարագին ներկա է գտնվել և Ստեփանակերտի քաղաքապետ Սուրեն Գրիգորյանը:

 

Ստեփանակերտի քաղաքապետարանի մամուլի ծառայություն