Պահոց
Տարադրամի Փոխարժեքներ
USD   485.98  դրամ
EUR   550.08  դրամ
RUB   7.56  դրամ
Եղանակը Ստեփանակերտում
28.02.2019   ՈԳԵԿՈՉԵԼՈՎ ՍՈՒՄԳԱՅԻԹՅԱՆ ԶՈՀԵՐԻ ՀԻՇԱՏԱԿԸ

ՈԳԵԿՈՉԵԼՈՎ ՍՈՒՄԳԱՅԻԹՅԱՆ ԶՈՀԵՐԻ ՀԻՇԱՏԱԿԸ

 

31 տարի առաջ, երբ Արցախի ժողովուրդը պատմական անարդարությունը վերանայելու պահանջով, խաղաղ ցույցեր և հանրահավաքներ էր անցկացնում Ստեփանակերտում ու Մոսկվա էր ուղարկվել մայր Հայաստանին վերամիավորելու վերաբերյալ ԼՂԻՄ մարզխորհրդի  արտահերթ նստաշրջանի որոշումը, հայերին ահաբեկելու և համաժողովրդական պայքարը կանգնեցնելու նպատակով, Ադրբեջանի ղեկավարությունը, Կրեմլի ուղղորդմամբ, հայազգի քաղաքացիների ջարդ կազմակերպեց Սումգայիթում, ինչը բարբարոս իր բոլոր դրսևորումներով <<մեկնարկային>> հանդիսացավ հանրապետության մյուս հայաշատ բնակավայրերի  համար:

Դահճի կողմից իրականացված հրեշավոր եղեռնին զոհ գնացին մի քանի տասնյակ անմեղ մարդիկ, այդ թվում` կանայք, երեխաներ ու ծերեր: Երեք օր շարունակ թուրք ոճրագործներն ու ազգայնամոլները ոստիկանության աջակցությամբ սարսափելի խոշտանգումների, սրի և հրի մատնեցին հայերին` <<գործողության>> մեջ դնելով  սպանդի, միջնադարի ժամանակներում իրենց նախորդներից ժառանգած ամենահրեշավոր ու անմարդկային ձեռնարկումները: Ցավոք, ԽՍՀՄ իշխանություններն  ու միջազգային կազմակերպությունները, որոնք կաարող էին կանխել ողբերգության հետագա սրացումն ու տարածումը` Ադրբեջանի մյուս քաղաքների վրա, անարձագանք թողեցին սումգայիթյան դեպքերը: Եվ, օգտվելով ամենաթողությունից, ազգերի մարդասպանների կողմից հայերի ջարդերն ու բռնի տեղահանումները զանգվածային բնույթ ստացան` վերաճելով արցախահայության  դեմ զինված պատերազմի:

31 տարի է անցել  այդ հրեշավոր դեպքերից, սակայն անդառնալի կորստի ցավից չեն սպիանում հարազատների վերքերը, 1988-ի փետրվարյան մղձավանջային օրերի հիշողությունները չեն լքում այդ ծանր ողբերգությունն ապրած մարդկանց, իրադարձությունների անմիջական ականատեսներին…

Փետրվարի 28-ին ոգեկոչելով  Սումգայիթի զոհերի հիշատակը, Ստեփանակերտի հասարակության ներկայացուցիչները բազմամարդ երթ կազմակերպեցին դեպի մայրաքաղաքի հուշահամալիր` իրենց բողոքն արտահայտելով անցյալ դարավերջի աննախադեպ եղեռնագործության նկատմամբ: Ժամը 11-ին երթի մասնակիցներին միացան և հարգանքի տուրք մատուցելով, Սումգայիթի զոհերի  հիշատակը խորհրդանշող հուշարձանին ծաղիկներ դրեց ԱՀ նախագահ Բակո Սահակյանը` Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանի և  պետական այրերի  ուղեկցությամբ:

Անմեղ զոհերի հիշատակը հարգել է նաև Ստեփանակերտի քաղաքապետ Սուրեն Գրիգորյանը:

 

 

Ստեփանակերտի քաղաքապետարանի մամուլի ծառայություն