ՀՅՈՒՐԸՆԿԱԼՎԵԼ ԵՆ ՄԵԾ ՀԱՅՐԵՆԱԿԱՆԻ ԵՎ ԱՐՑԱԽՅԱՆ ՊԱՏԵՐԱԶՄԻ ՎԵՏԵՐԱՆՆԵՐԸ

Ավագ սերնդի անցած ճանապարհը միշտ էլ ուսանելի օրինակ է հանդիսացել երիտասարդների համար, ոգեշնչել և մղել նորանոր խիզախումների: Այդ տեսակետից  իր մեջ հետաքրքիր  խորհուրդ է պարունակում Մեծ հայրենականի մասնակիցների սխրանքներով լի մարտական ուղին, որը 1945-ի մայիսի 9-ին նշանավորվեց գերմանական ֆաշիզմի դեմ տարած հաղթանակով:

Խորհրդային Միության  բազմազգ ընտանիքում իրենց հերոսությամբ աչքի ընկան և  հայ ժողովրդի պանծալի զավակները` պատերազմի տարեգրության մեջ թողնելով մնայուն էջեր: Թշնամու դեմ պայքարից անմասն չմնացին արցախցիները` կյանքի գնով մոտեցնելով հաղթանակը: Տարիներ անց սերտելով պապերից ու հայրերից ժառանգած դասերը, նրանց զավակներն անձնվիրաբար քննության բռնեցին Արցախյան գոյամարտի տարիներին` փառքով  պսակելով իրենց անունները: 1992-ի մայիսի 9-ին ազատագրելով հայոց բերդաքաղաք Շուշին, ինքնապաշտպանական մեր ջոկատները դրանով  իսկ հետագա  հաղթանակների սկիզբը  դրեցին` ռազմական  գործողություններում  ամրագրելով փայլուն հաջողություններ: Նրանց սխրանքը կրկնեցին և ապրիլյան պատերազմի մեր հերոս տղաները` արժանի հակահարված հասցնելով թշնամուն ու շպրտելով նրան  ելման դիրքեր: Ցավոք, ռազմական գործողությունների ժամանակ, անհավասար մարտերում հայկական կողմը ևս անդառնալի կորուստներ ունեցավ:

Մայիսյան խորհրդանշական եռատոնն առիթ է մեծարելու և արժևորելու երկու դաժան պատերազմների միջով անցած սերունդների ներկայացուցիչներին: Մայիսի 8-ին Ստեփանակերտի քաղաքապետ  Սուրեն Գրիգորյանը քաղաքապետարանում հյուրընկալելով Մեծ  հայրենականի և Արցախյան ազատամարտի մի խումբ վետերանների, ինչպես և ապրիլյան քառօրյա պատերազմի մասնակիցների, հիշարժան իրադարձության` Մեծ հաղթանակի Շուշիի ազատագրման և պաշտպանության բանակի կազմավորման տարեդարձի կապակցությամբ նրանց պատվին կազմակերպել էր ընդունելություն:

Ստեփանակերտի քաղաքապետարանի աշխատակազմի, բոլոր ստեփանակերտցիների և անձամբ իր անունից ողջունելով և ջերմորեն շնորհավորելով  եռատոնի առթիվ, Ս.Գրիգորյանը հյուրերին մաղթեց արցախյան  երկարակեցություն, երջանկություն և  խաղաղություն: <<Մեր ժողովուրդը երբեք չի մոռանա ինչպես Մեծ հայրենականի, այնպես էլ` արցախյան  պատերազմի մասնակիցների ծանրակշիռ ավանդը, ինչն  անփոխարինելի արժեք է սերունդների համար,- ասաց նա: - Ցավոք, հազարավոր հայորդիներ նահատակվեցին ծանր մարտերում` անավարտ թողնելով բազում իղձեր ու  երազանքներ: Փառք ու  պատիվ նրանց ծնած ու սնած մայրերին>>:

Բարձր գնահատելով պատերազմի վետերանների վաստակն ու ներդրումը` հայրենիքի ազատագրման գործում, քաղաքապետը  հավաստիացրեց, որ նրանց օրինակով տասնյակ սերունդներ են դաստիարակվելու:  Նա զուգահեռներ անցկացրեց մայիսյան հաղթանակների միջև`  կարևորելով նրանց հաջորդականությունը: Սուրեն Գրիգորյանն ափսոսանք հայտնելով, որ տարեցտարի  նոսրանում են Մեծ հայրենականի մասնակիցների շարքերը, միաժամանակ ընդգծեց <<Հպարտ ենք, որ դուք այսօր, որպես կենդանի լեգենդներ, կաք ու այսօր մեր կողքին եք, մեր շարքերում: Ձեր իմաստուն խորհրդի կարծիքը մենք միշտ էլ զգում ենք>>: Մեծ հայրենականի և Արցախյան պատերազմի վետերաններին  մեկ անգամ ևս շնորհավորելով հիշարժան իրադարձությունների առիթով, քաղաքապետը նրանց եռանդ, տոկունություն և առողջություն մաղթեց:

Մայիսյան եռատոնի կապակցությամբ ներկաներին ողջունեցին և տոների կապակցությամբ շնորհավորեցին  նաև քաղաքապետարանի կրթության և սպորտի բաժնի պետ Կառլեն Մարգարյանն ու  մամուլի քարտուղար,  բանաստեղծ Դավիթ Միքայելյանը:

Այնուհետև սեղանի շուրջ աշխույժ և անկաշկանդ զրույց ծավալվեց: Մեծ հայրենականի վետերաններ Սերգեյ Բարսեղյանը, Վաղարշակ Գրիգորյանը, Մուշեղ Նասիբյանը, արցախյան պատերազմի վետերանների միության աշխատակազմի ղեկավար Էդվարդ Խաչատրյանը դրվագներ հիշեցին պատերազմի ահեղ տարիներից, շնորհակալություն հայտնեցին քաղաքային իշխանություններին` ջերմ ընդունելության և իրենց վաստակը  բարձր գնահատելու համար: Վերջում` Ս.Գրիգորյանն օրվա հյուրերին քաղաքապետարանի կողմից հանձնեց  հուշանվերներ:

Հանդիպմանը ներկա էին  քաղաքապետի տեղակալներ  Սուրեն Թամրազյանը,  Արմեն Հակոբյանը և աշխատակազմի ղեկավար Գագիկ  Նազլուխանյանը:     

Ստեփանակերտի քաղաքապետարանի  մամուլի ծառայություն