Հունիսի 25-ին Ստեփանակերտի <<Վալեքս Գարդեն հոթել>> հյուրանոցային համալիրի մարզադաշտում մեկնարկել է <<Կաշվե գնդակի>> քաղաքային առաջնությունը, որն ավանդաբար անցկացվում է բակային պատանեկան թիմերի միջև:
Միջոցառման հանդիսավոր բացմանը ներկա է գտնվել նաև Ստեփանակերտի քաղաքապետ Սուրեն Գրիգորյանը: Կարևորելով ավանդական դարձած մարզական նման միջոցառումների կազմակերպումը պատանիների միջև, քաղաքապետը համոզմունք է հայտնել, որ մրցույթը կնպաստի նրանց կարողությունների լիարժեք դրսևորմանը և շնորհալիների բացահայտմանը, ոգևորության հանդես կբերի խաղացողների շրջանում, ու <<երեխաներն ավելի եռանդով ու սիրով կվերաբերվեն սպորտին, պրոֆեսիոնալ ֆուտբոլի նկատմամբ>>:
Ըստ Ստեփանակերտի քաղաքապետի` հատուկ հանձնարարությունների գծով օգնական Է.Առուշանյանի, առաջնությանը մասնակցում են թվով 16 թիմեր: Այն կտևի մեկ շաբաթ:
Ստեփանակերտի քաղաքապետարանի մամուլի ծառայություն