Պահոց
Տարադրամի Փոխարժեքներ
USD   487.27  դրամ
EUR   549.69  դրամ
RUB   7.31  դրամ
Եղանակը Ստեփանակերտում
02.05.2017   ԵՐԵՎԱՆԻ ՔԱՂԱՔԱՊԵՏԱՐԱՆԻ ՀԵՐԹԱԿԱՆ ՆԱԽԱՁԵՌՆՈՒԹՅՈՒՆԸ

ԶԻՆՎՈՐ ՈՐԴԻՆԵՐԻՆ ՏԵՍԱԿՑԵԼՈՒ ԵՆ ԵԿԵԼ ԾՆՈՂՆԵՐԸ…

Արցախում իրենց զինվորական առաքելությունն իրականացնող զավակներին տեսակցելու նպատակով մայիսյան եռատոնի նախաշեմին Երևանի քաղաքապետ Տարոն Մարգարյանի հովանավորությամբ ծնողների և հարազատների հերթական մեծաթիվ խմբերն այցելեցին Ստեփանակերտ:

Պատվիրակության շուրջ 400 անդամներին մայրաքաղաք Երևանից հանդիսավորությամբ  ճանապարհել և զինվոր տղաներին անփորձանք, խաղաղ ծառայություն  են մաղթել քաղաքապետ Տարոն Մարգարյանն ու ՀՀ պաշտպանության նախարար Վիգեն Սարգսյանը: Ավտոմեքենաների շարասյանն ուղեկցել են ոստիկանության աշխատակիցները:

Երևանից ժամանած հյուրերին ավանդական աղուհացով, զուռնա-դհոլով են դինավորել Ստեփանակերտում տեղակայված սպարապետ  Վազգեն Սարգսյանի անունը կրող զինվորական զորամասում: ՊԲ բարձրաստիճան  սպաների և զորամասի հրամանատարության հետ այստեղ էին նաև Ստեփանակերտի փոխքաղաքապետներ Սուրեն Թամրազյանն ու Արմեն Հակոբյանը: Երևանի իրենց պաշտոնակիցների` քաղաքապետարանի սոցիալական  ապահովության վարչության պետ Ռուզան Զաքարյանի, տրանսպորտի վարչության պետ Հենրիկ Նավասարդյանի, <<Երքաղլույս>> ընկերության գլխավոր տնօրեն Վարդան Գաբրիելյանի հետ ծաղիկներ տեղադրեցին Արցախի հերոսի հուշարձանին:

Բանակ-հասարակության կապի ամրապնդմանն էր միտված զորամասում կազմակերպված միջոցառումը, զինվորներին ուղղված բարեմաղթանքի խոսքերով և պատգամներով դիմեցին Երևանի քաղաքապետարանի սոցիալական ապահովության վարչության պետ Ռուզան Զաքարյանը, Ստեփանակերտի փոխքաղաքապետ Սուրեն Թամրազյանը, ՊԲ ներկայացուցիչներ, ծնողներ: Միջոցառման կազմակերպիչներին իրենց երախտիքի խոսքերն ուղղեցին զինծառայողները` խոստանալով հավատարիմ մնալ պապերի և հայրերի հարուստ ավանդույթներին, պատվով ծառայել հայրենիքին: Ջերմ և սրտառուչ մթնոլորտում ծնողները հնարավորություն ունեցան անկաշկանդ շփվել զինվորների հետ և ծանոթանալ նրանց զինվորական առօրյային:

Հանդիպումը եզրափակվեց Ստեփանակերտի քաղաքապետարանի մշակույթի տան գեղարվեստական համույթի համերգային ծրագրով: Միասնական շուրջպարին, բնականաբար, իրենց մասնակցությունը բերեցին նաև զինվորները, ծնողներն ու հարազատները:

Ստեփանակերտի քաղաքապետարանի մամուլի ծառայություն